Innanlandsstarf
Um 13 milljónum úthlutað til þessa
26. janúar 2024
Úthlutunarnefnd hefur nú úthlutað rétt tæplega 13 milljónum króna úr neyðarsöfnun Rauða krossins til 144 fjölskyldna frá Grindavík. Úthlutunin heldur áfram þar til allt það fé sem safnast er komið í hendur Grindvíkinga í neyð.
Úthlutunarnefnd hefur nú úthlutað tæplega 13 milljónum króna af því fé sem Rauði krossinn á Íslandi hefur safnað í yfirstandandi neyðarsöfnun. Úthlutun er enn í fullum gangi og Grindvíkingar geta sótt um fjárhagsaðstoð í gegnum Þjónustumiðstöðina í Tollhúsinu á Tryggvagötu.
Rauði krossinn hefur getað styrkt 144 grindvískar fjölskyldur til þessa með þessu fé, en söfnunin og úthlutunin stendur enn yfir, svo enn fleiri Grindvíkingar fá stuðning.
Söfnunin hefur gengið gríðarlega vel og tæplega 30 milljónir króna hafa safnast. Íslenska þjóðin og fólk um allan heim hefur stutt söfnunina og árangurinn sýnir hve margir vilja leggja Grindvíkingum lið á þessum erfiðu tímum. Söfnuninni er ætlað að létta undir með Grindvíkingum nú þegar þeir standi frammi fyrir alls kyns fjárhagslegum áskorunum, til viðbótar við þá grimmu staðreynd að mega ekki fara heim til sín. Við viljum þakka almenningi fyrir þessar öflugu viðtökur.
Allt fé sem rennur í söfnunina fer beint í úthlutun, að undanskildum lágmarks kostnaði við söfnunina og úthlutunina sjálfa. Um 99% af því fé sem hefur safnast fer því beint til Grindvíkinga.
Víðtæk neyðaraðstoð frá fyrsta degi
Auk söfnunarinnar hefur Rauði krossinn tekið þátt í rýmingum bæjarins, opnað fjöldahjálparstöðvar til að taka á móti fólki sem hafði engan samastað og veitt sálrænan stuðning, bæði í Þjónustumiðstöðinni á Tryggvagötu og í gegnum Hjálparlínuna 1717 og Netspjallið 1717.is. Rauði krossinn sér einnig um rekstur Þjónustumiðstöðvarinnar, ásamt Almannavörnum og Grindavíkurbæ.
Svona getur þú styrkt söfnunina:
👉https://www.raudikrossinn.is/styrkja/stakur-styrkur/
👉SMS: Senda HJALP í símanúmerið 1900 (2.900 kr.) (Síminn og Nova)
👉Hringja í 904-2500 til að styrkja um 2.500 kr.
👉Aur/Kass: @raudikrossinn
👉Söfnunarreikningur Rauða krossins: 0342-26-12, kt. 530269-2649
Fréttir af starfinu
Fréttayfirlit
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.
Kristín S. Hjálmtýsdóttir lætur af störfum sem framkvæmdastjóri Rauða krossins á Íslandi
Almennar fréttir 02. desember 2024Stjórn Rauða krossins á Íslandi og Kristín S. Hjálmtýsdóttir, framkvæmdastjóri félagsins síðastliðin 9 ár, hafa gert samkomulag um starfslok hennar. Viðræður um starfslokin áttu sér stað að frumkvæði Kristínar, sem hefur nú þegar látið af störfum. Arna Harðardóttir sem gengt hefur starfi fjármálastjóra mun taka við verkefnum framkvæmdastjóra samhliða sínum störfum þar til nýr framkvæmdastjóri hefur verið ráðinn. Staðan verður auglýst innan skamms.