Innanlandsstarf
Menningarhúsin í Kópavogi taka við verkefninu Æfingin skapar meistarann
30. nóvember 2020
Menningarhúsin í Kópavogi taka við verkefninu Æfingin skapar meistarann frá og með áramótum.
Verkefnið Æfingin skapar meistarann er samstarfsverkefni Rauða krossins og Mímis og hefur verið virkt síðan vorið 2017. Vegna aðstæðna hefur Kópavogsdeild Rauða krossins ekki tök á að sinna verkefninu með sama hætti og áður. Menningarhúsin í Kópavogi verða frá og með áramótum fram að sumarfríi ábyrgðaraðili verkefnisins, munu sjá um utanumhald, framkvæmd og þróun verkefnisins. Framhaldið verður síðan skoðað í ljósi þess hvernig gengur þá önnina.
Sjálfboðaliðar verkefnisins eru enn sjálfboðaliðar Rauða krossins og mun aðkoma Rauða krossins vera í sjálfboðaliðamálum.
Markmiðið er að þjálfa talmál og auka orðaforða fólks sem hefur hagnýtt gildi í daglegu lífi. Æfingin skapar meistarann er líka góður vettvangur til þess að kynnast nýju fólki og mynda ný vináttubönd. Tilgangur verkefnisins er að gefa innflytjendum á Íslandi tækifæri til að æfa sig að tala íslensku eftir að þeir hafa lært grunnatriði í málinu.
Heiti verkefnisins verður nú Spjallið og mun að öllum líkindum fara fram annan hvern laugardag kl. 11-12:30 á bókasafni Kópavogs, Hamraborg 6a. Frekari upplýsingar um starfið mun birtast á vefsíðu bókasafnsins í Kópavogi hér.
Bókasafnið í Spönginni mun einnig bjóða upp á sambærilegar samverur aðra hverja viku, vikuna á móti bókasafninu í Kópavogi.
Verkefnið Æfingin skapar meistarann hefur svo sannarlega vaxið og dafnað, þökk sé góðrar þátttöku á meðal sjálfboðaliða og notenda. Sjálfboðaliðar Rauða krossins bera starfið uppi og útkoman er skemmtilegt, vinalegt og sjálfseflandi umhverfi fyrir fólk af erlendum uppruna. Við teljum þetta vera gott skref fyrir verkefnið og tækifæri til þess að blómstra enn frekar.
Kópavogsdeild Rauða krossins þakkar Mími símenntun fyrir gott samstarf á síðastliðnum árum.
Frekari upplýsingar má nálgast með því að senda tölvupóst á kopavogur@redcross.is.
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.