Alþjóðastarf

Söfnunin hefur staðið yfir í rúman mánuð og á þeim tíma hefur um milljón króna safnast, sem verður notuð til að veita lífsbjargandi mannúðaraðstoð á svæðinu með því að gefa fólki aðgang að vatni, matvælum, fjárhagsaðstoð og heilbrigðisaðstoð. 

Söfnuninni var ætlað að koma til móts við þann alvarlega fæðuskort sem tugmilljónir standa frammi fyrir í fjölda ríkja í Afríku sunnan Sahara, en ástandið er einna verst í Sómalíu, þar sem milljónir eru á barmi hungursneyðar. Fæðuskorturinn hefur einnig leitt til ýmissa samfélagslegra vandamála. Ýmsir áhrifaþættir hafa skapað þessar erfiðu aðstæður, fyrst og fremst langvinnir þurrkar. 

Rauði krossinn þakkar þeim sem lögðu söfnuninni lið kærlega fyrir sitt framlag, það mun nýtast vel til að mæta þeim miklu erfiðleikum sem fólk á þessum svæðum stendur frammi fyrir.

Að sögn Atla Viðars Thorstensen, sviðsstjóra alþjóðasviðs Rauða krossins, er niðurstaðan úr neyðarsöfnuninni þó ákveðin vonbrigði því hamfarirnar eru svo umfangsmiklar að við höfum ekki séð annað eins í marga áratugi þegar kemur að fæðuóöryggi og hungri í svo mörgum ríkjum álfunnar.  

„Þetta er þó kannski skiljanlegt að einhverju leyti“, segir hann. „Átökin í Úkraínu hafa beint sjónum ríkja og almennings að neyðinni þar, sem er gríðarlega mikil, og vert er að þakka fyrir þá aðstoð sem bæði ríkisstjórnir og almenningur víða um heim hafa sýnt þolendum átakanna þar í landi. Það er þó vonandi að það sé til inneign fyrir sambærilega samstöðu og stuðning fyrir þá tugi milljóna sem standa frammi fyrir verstu þurrkum og fæðuskort í fjóra áratugi í fjölmörgum löndum Afríku sunnan Sahara.” 

Þrátt fyrir að neyðarsöfnuninni sé lokið þýðir það alls ekki að Rauði krossinn á Íslandi sé hættur að reyna að mæta erfiðleikunum á svæðinu. Þau sem vilja styðja við hjálparstarfið í þessum ríkjum geta áfram gert það með því að gerast Mannvinir Rauða krossins hér.