Alþjóðastarf

Rauði krossinn á Íslandi hóf neyðarsöfnun vegna hamfaranna sem hægt er að styðja hér á heimasíðunni okkar. Í gær gaf Alþjóðasamband Rauða krossins og Rauða hálfmánans eftirfarandi upplýsingar um stöðuna í Marokkó og Líbíu, sem varpa ljósi á viðbrögð þarlendra landsfélaga og stöðuna í hjálparstarfinu. 

Staðan í Marokkó 

Jarðskjálfti af stærðinni 6,8 varð í Marokkó þann 8. september. Yfir 3000 manns létust og þúsundir slösuðust. Hjálp er byrjuð að berast á einangruð svæði en vegir eru illa farnir og það hefur gert hjálparstarfið erfitt. 

Alþjóðasambandið hefur sent út neyðarbeiðni fyrir Marokkó upp á 100 milljónir svissneskra franka, sem samsvarar rúmlega 15 milljörðum íslenskra króna, og þau sem vilja leggja sitt af mörkum geta gert það með því að styrkja neyðarsöfnun Rauða krossins á Íslandi.  

Enn hefur hjálp ekki borist til allra afskekktu þorpanna í Atlas-fjöllum og þar sem vegir eru illa farnir. Ástand vega fer versnandi og viðbragðsaðilar, þar á meðal Rauði hálfmáninn, eru í kappi við tímann til tryggja að þessi samfélög fái stuðning áður en rigningar hefjast og einangra þau enn frekar.  

Neyðarsöfnuninni er ætlað að efla hjálparstarf Rauða hálfmánans í Marokkó til að mæta mest áríðandi þörfum þolenda sem og setja upp bráðabirgðalausnir til að bæta aðstæður þeirra til skamms tíma. Þörf er fyrir heilbrigðisþjónustu, hreint drykkjarvatn, hreinlætisaðstöðu, húsaskjól, ýmsar nauðsynjar, vernd og fleira. 

Fullnægjandi heilbrigðisþjónustu og hreint drykkjarvatn er nauðsynlegt til að koma í veg fyrir enn frekari hörmungar. Mörg hundruð sjálfboðaliðar Rauða hálfmánans í Marokkó starfa nú í fjórum ólíkum héruðum sem urðu fyrir barðinu á skjálftanum. Litlar líkur eru á að finna fleiri á lífi í rústunum og áherslan er nú að snúast að því að hlúa að þolendum með því að tryggja grunnþarfir þeirra og veita sálrænan stuðning. 

Þörf er fyrir ljósabúnað sem gengur fyrir sólarorku á svæðum þar sem það mun taka einhverjar vikur að koma rafmagni aftur á og fyrir slökkvitæki handa þeim sem eru að gista í bráðabirgðaskýlum og tjöldum. Þegar það fer að kólna fara sífellt fleiri að elda innandyra og nota gashitara, sem eykur eldhættu. 

Aðgengi er enn aðaláskorunin fyrir hjálparstarf vegna þess að áhrifa jarðskjálftans gætir á mjög stóru svæði. Það eru enn nokkur hundruð þorp á svæðinu sem aðeins er hægt að ná til á mótorhjóli eða asna. Á næstu dögum og vikum þarf að tryggja að ekkert þeirra gleymist. 

Sjálfboðaliðar Rauða hálfmánans á svæðinu eru ómetanlegir. Þeir þekkja svæðið, vita hvar þorpin eru og eru í góðu sambandi við yfirvöld á svæðinu til að tryggja að hjálparstarfið sé eins skilvirkt og hraðvirkt og hægt er. 

Staðan í Líbíu 

Þann 10. september skall stormurinn Daníel á Líbíu, sem leiddi til gríðarlegra flóða. Innviðir urðu fyrir miklum skemmdum og tvær stíflur fyrir ofan borgina Derna brustu, með þeim afleiðingum að heilu hverfin skoluðust á haf út. Talið að yfir 10 þúsund manns hafi látist í flóðunum, en það hefur ekki verið hægt að staðfesta þessar tölur. 

Næstum fjórðungur af borginni Derna skolaðist burt í flóðinu, samkvæmt sjálfboðaliðum Rauða hálfmánans sem eru á staðnum. Borgin er nú orðin aðgengileg og hjálp er að berast til hennar, en það er erfitt að komast inn í borgina og miklar tafir eru á flutningum. Aðalspítalinn í borginni skemmdist illa í flóðinu og þar er ekki hægt að bjóða upp á fullnægjandi heilbrigðisþjónustu. Fyrir vikið er mikil þörf fyrir heilbrigðisvörur. 

Rauði hálfmáninn í Líbíu einbeitir sér að því að hjálpa þolendum flóðsins með því að veita þeim þúsundum sem hafa misst heimili sín húsaskjól í tveimur skólum, hjálpa fjölskyldum að sameinast, veita sálræna fyrstu hjálp og dreifa hjálpargögnum. Það skortir varanlega lausn fyrir þann fjölda sem hefur misst heimili sín. 

Hjálp er að berast frá öðrum landsfélögum Rauða krossins og Rauða hálfmánans. Þrjár flugvélar komu með björgunarbúnað, lækningarvörur og skyndihjálparbúnað frá Tyrklandi, en hluti af þessu kom frá Rauða hálfmánanum í Tyrklandi og starfsmenn hans komu með til að styðja neyðarviðbragð Rauða hálfmánans í Líbíu. Einnig hafa borist hjálpargögn frá Rauða krossinum í Ítalíu og Rauða hálfmánanum í Egyptalandi, Íran, Sameinuðu arabísku furstadæmunum og Katar. 

Rauði hálfmáninn í Líbíu hefur í gegnum björgunarstarf sitt fundið mikinn fjölda látinna og mikil áhersla er lögð á að huga að meðferð líkanna sem fyrst en um leið að tryggja að þeim sé sýnd virðing. 

Hörmungarnar sem hafa dunið á Líbíu eru gríðarlegar, en við höfum líka heyrt jákvæðar sögur af samstöðu með þolendum flóðsins. Margir Líbíumenn hafa ferðast frá vesturhluta landsins til að hjálpa til í austurhlutanum, sem varð verst úti, og þar sem Rauði hálfmáninn í Líbíu er hlutlaus getur hann starfað óhindrað um allt landið, þrátt fyrir pólitískan klofning þar í landi.