Alþjóðastarf
Hjálpargögn berast frá alþjóðahreyfingu Rauða krossins og Rauða hálfmánans
10. febrúar 2023
Mikið magn hjálpargagna er komið til Sýrlands frá landsfélögum um allan heim.
Síðan jarðskjálftinn reið yfir þann 6. febrúar og olli ólýsanlegum skemmdum í bæði Tyrklandi og Sýrlandi hafa fjölmörg landsfélög Rauða krossins og Rauða hálfmánans sent hjálpargögn á vettvang til Sýrlands. Aðstoð Rauða krossins hefur verið að berast frá því á þriðjudaginn og er stöðugt að aukast.
Þannig brugðust landsfélög Rauða krossins og Rauða hálfmánans í Alsír, Egyptalandi, Palestínu, Írak, Íran, Sameinuðu arabísku furstadæmunum, Kúveit og Kína við og sendu til að mynda lyf og lækningabúnað, dýnur, teppi, tjöld, matvæli, hreinlætisgögn og fleiri nauðsynjar til þolenda á skjálftasvæðunum í norðurhluta Sýrlands, en auk þess hefur líbanski Rauði krossinn sinnt björgunarstörfum á vettvangi.
„Sem betur fer gátu Rauða hálfmánafélögin í bæði Tyrklandi og Sýrlandi brugðist hratt við hamförunum því þau eru á sínum heimaslóðum með víðfeðmt og skipulagt net sjálfboðaliða og starfsmanna sem gátu strax farið á hamfarasvæðin og veitt lífsbjargandi aðstoð,“ segir Atli Viðar Thorstensen sviðsstjóri alþjóðasviðs Rauða krossins. „Aðstæður í Sýrlandi til björgunar og uppbyggingarstarfs eru án efa erfiðari heldur en í Tyrklandi vegna þeirra vopnuðu átaka sem landsmenn í Sýrlandi hafa búið við í meira en áratug og hafa að miklu leyti lagt innviði landsins í rúst.
Því skiptir svo gríðarlegu miklu máli að landsfélög Alþjóðahreyfingar Rauða krossins og Rauða hálfmánans geti brugðist svo skjótt við og komið þessari aðstoð til Rauða hálfmánans í Sýrlandi sem getur fyrir vikið veitt þolendum aðstoð í þessum hörmungum,“ bætir Atli við.
Rauði krossinn á Íslandi, með aðstoð þeirra sem hafa lagt neyðarsöfnun félagsins lið, utanríkisráðuneytisins og Mannvina Rauða krossins, hefur sent 30 milljónir króna til skjálftasvæðanna sem nýtast í lífsbjargandi mannúðaraðstoð á skjálftasvæðunum.
--
Rauði krossinn á Íslandi tilheyrir allri þjóðinni, en án stuðning hennar getur félagið ekki sinnt þeim fjölmörgu mikilvægu verkefnum sem það stendur fyrir. Hjálpaðu okkur að hjálpa öðrum með því að gerast Mannvinur.
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.