Alþjóðastarf
Fyrstu viðbrögð hreyfingarinnar vegna hamfara í Marokkó
11. september 2023
Á föstudagskvöld varð öflugur jarðskjálfti í Marokkó sem kostaði þúsundir lífið og olli mikilli eyðileggingu. Rauði hálfmáninn hóf strax störf við að bregðast við þessum hörmungum.
Jarðskjálftinn var af stærðinni 6,8 og upptök hans voru á litlu dýpi í Atlasfjöllum, um 75 kílómetra suðaustur af Marrakesh. Nítján mínútum síðar varð eftirskjálfti sem var 4,9 að stærð.
Tala látinna er nú komin í tæplega 2500 manns, en það er enn ekki ljóst hve margir hafa látist og slasast, þar sem þau þorp og bæir sem urðu verst úti eru í ógreiðfæru fjalllendi.
Rauði hálfmáninn í Marokkó, sem hefur 8000 sjálfboðaliða, brást umsvifalaust við skjálftanum og er að hjálpa til við að meta aðstæður, samhæfa björgunaraðgerðir og veita þolendum skjálftans aðstoð í samvinnu við yfirvöld og aðra viðbragðsaðila.
Alþjóðasamband Rauða krossins, þar á meðal Rauði krossinn á Íslandi, votta aðstandendum þeirra sem hafa týnt lífi í þessum hörmungum dýpstu samúð og óskar þeim sem hafa slasast skjóts bata.
Það sem skiptir höfuðmáli núna er að bjarga lífum með öflugum björgunaraðgerðum, ásamt því að hlúa að þolendum skjálftanna.
Ekkert landsfélag getur brugðist við slíkum hamförum eitt síns liðs. Alþjóðasamband Rauða krossins mun styðja við viðbrögðin vegna hamfaranna og hefur þegar sent rúmlega 150 milljónir króna til að styðja við björgunaraðgerðir, auk þess sem ýmis landsfélög hafa boðið fram aðstoð sína. Þetta neyðarviðbragð er maraþon, en ekki spretthlaup. Mikilvægt er að bregðast hratt við, en þolendur skjálftanna munu þurfa stuðning næstu vikur og mánuði.
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.