Alþjóðastarf

Ástandið í austurhluta Líbíu er enn mjög slæmt eftir að stormurinn Daníel skall á landinu þann 10. september, en þá fór vindhraði yfir 70 km/klst og mikil flóð urðu sem náðu sjö metra dýpt. Strandborgir í austurhluta Líbíu hafa farið hvað verst út úr hamförunum þar í landi, sérstaklega Derna, þar sem tvær stíflur brustu þann 11. september, en það leiddi til gríðarmikils flóðs. 

Heilu fjölskyldurnar hafa látist og heilu hverfin skolast á haf út. Vegakerfið við ströndina er mikið skemmt og sums staðar eru engin fjarskipti. Vegna vopnaðra átaka sem áttu sér stað á svæðinu eru virkar sprengjur í og kringum borgina Derna og flóðin hafa aukið hættuna á að þær ógni almennum borgurum. 

Svæðin í austurhluta landsins sem fóru hvað verst út úr hamförunum standa frammi fyrir áður óséðri mannúðarkrísu sem þarf að bregðast við með samvinnu mannúðarsamtaka og þarlendra stjórnvalda. Enn er erfitt að meta umfang neyðarinnar vegna ýmissa áskorana á hamfarasvæðunum sem gera það líka erfitt að mæta þörfum þolenda hamfaranna.

Öll líbíska þjóðin hefur hjálpast að við að flytja mat og aðrar nauðsynjar til þolenda hamfaranna. Alþjóðaráð Rauða krossins hefur einnig tekið þátt í neyðarviðbragðinu með ýmsum hætti. 

Stuðningur Alþjóðaráðs Rauða krossins 

Alþjóðaráð Rauða krossins (ICRC) hefur gefið næstum sex þúsund líkpoka og veitt ýmis konar tæknilegan stuðning, auk þess að senda matvæli, lyf og aðrar nauðsynjar til þolenda hamfaranna. 

Þessa dagana einbeitir ICRC sér að því að veita þeim fjölskyldum sem hafa orðið hvað verst úti í hamförunum neyðaraðstoð og er að veita yfir 6.250 fjölskyldum nauðsynleg búsáhöld og helstu hreinlætisvörur og 1.800 fjölskyldum mataraðstoð. ICRC veitir einnig starfsfólki og sjálfboðaliðum Rauða hálfmánans í Líbíu þjálfun í notkun neyðarbúnaðar sem það gaf til að tryggja hreint drykkjarvatn og almennt hreinlæti. 

ICRC styður einnig við heilbrigðisþjónustuna á heilsugæslum og spítölum sem urðu fyrir skemmdum í flóðunum og hefur unnið náið með Rauða hálfmánanum í Líbíu við að leita að þeim sem týndust. Fólk á skilið að fá svör og hver klukkustund sem líður þar sem þau lifa í óvissu um ástvini sína eykur á þjáningu þeirra. Alþjóðaráðið hefur meðal annars sent sérfræðinga til landsins til að hjálpa til við að bera kennsl á hina látnu til að styðja þetta starf.