Alþjóðastarf
Bráðaliðar drepnir við störf sín
31. mars 2025
Í sautján mánuði hafa bráðaliðar og aðrir viðbragðsaðilar á Gaza þurft að bregðast við ólýsanlegum þjáningum fólks.
Alþjóðaráð Rauða krossins (ICRC) segir svívirðilegt að átta bráðaliðar á vegum palestínska Rauða hálfmánans (PRCS), auk starfsmanna almannavarna á Gaza og Sameinuðu þjóðanna, hafi verið drepnir við störf sín á svæðinu. Kennsl voru borin á líkamsleifar fólksins í gær, sunnudag. „Þetta starfsfólk og sjálfboðaliðar voru að hætta lífi sínu til að aðstoða aðra,“ segir í yfirlýsingu ICRC. „Við erum harmi slegin og syrgjum ásamt fjölskyldum þeirra, ástvinum og samstarfsfólki.“

Þann 23. mars voru sjálfboðaliðar palestínska Rauða hálfmánans að sækja sært fólk þegar samband við þá rofnaði. Síðan þá hefur ICRC átt í reglulegum samskiptum við PRCS sem og aðila í átökunum og óskað eftir aðgengi til að finna sjálfboðaliðana.
Í sautján mánuði hafa bráðaliðar og aðrir viðbragðsaðilar á Gaza þurft að bregðast við ólýsanlegum þjáningum fólks. ICRC segir hrikalegt hversu margt heilbrigðisstarfsfólk hafi verið drepið. „ICRC fordæmir harðlega árásir á heilbrigðisstarfsfólk,“ segir í yfirlýsingunni. „Dauði hvers einasta hjálparstarfsmanns og heilbrigðisstarfsmanns er harmleikur fyrir fjölskyldur þeirra og samfélag og sker á lífsnauðsynlega björgunarlínu fyrir særða og sjúka.“ ICRC ítrekar ákall sitt um að allar upplýsingar verði gerðar aðgengilegar til að skýra örlög þeirra einstaklinga sem enn er saknað.
Heilbrigðis- og hjálparstarfsfólk gegnir mikilvægu hlutverki í viðbrögðum við neyðarástandi. Það verður að vera öruggt við störf sín. „Alþjóðleg mannúðarlög eru skýr: Heilbrigðisstarfsfólk, sjúkrabíla, hjálparstarfsfólk og almannavarnasamtök skal virða og vernda. Það er stranglega bannað að ráðast á þau eða hindra för þeirra. Grípa verður til allra mögulegra ráðstafana til að tryggja öryggi þeirra,“ segir í yfirlýsingu Alþjóðaráðs Rauða krossins, ICRC.
Fréttir af starfinu
Fréttayfirlit
Mánuður frá hamförunum: Enn mikil neyð
Alþjóðastarf 28. apríl 2025„Fólk heldur að um leið og fjölmiðlar hætti að fjalla um hlutina þá sé ekkert að gerast,“ segir Gísli Rafn Ólafsson, framkvæmdastjóri Rauða krossins á Íslandi. Svo sé hins vegar alls ekki. „Það geta liðið mánuðir og jafnvel ár þar til fólk verður búið að ná sér eftir þetta áfall.“

Sjálfboðaliðastörf eru valdeflandi
Innanlandsstarf 07. apríl 2025Þær eru úrræðagóðar, framtakssamar og lífsglaðar. Sjálfboðaliðar ársins 2024 hjá höfuðborgardeild Rauða krossins kenna ensku, íslensku og heimsækja fólk og nálgast ólík verkefni sín af einstakri fagmennsku.

„Samfélagið sér framlag okkar og það er mikil hvatning“
Innanlandsstarf 03. apríl 2025Starfið í Eyjafjarðardeild Rauða krossins er á fleygiferð og mikið um að vera, segir Ingibjörg Halldórsdóttir deildarstjóri. Aldrei hafi fleiri sjálfboðaliðar starfað hjá deildinni og á síðasta ári.