Almennar fréttir

Rauði krossinn heldur starfsemi sinni í norðaustur Sýrlandi áfram þrátt fyrir harðnandi átök.
- Rauði krossinn á Íslandi hefur hafið neyðarsöfnun fyrir Sýrland

Eftir rúm átta ár af átökum hefur Sýrland enn einu sinni komist í heimsfréttirnar vegna harðnandi átaka. Þau sem líða mest fyrir átökin eru almennir borgarar. Talið er að um 11.7 milljónir einstaklinga þurfi á mannúðaraðstoð að halda. Einn af hverjum tveimur hefur þurft að yfirgefa heimili sitt og annaðhvort flúið innan Sýrlands eða til annarra landa í leit að öryggi. Innviðir landsins eru viðkvæmir eða ekki til staðar eftir svo mörg ár af átökum.

Í borginni Hasskeh í norðaustur Sýrlandi verður vatni og hjálpargögnum áfram dreift og vettvangssjúkrahús Rauða krossins við Al Hol flóttamannabúðirnar heldur starfsemi sinni áfram, þrátt fyrir harðnandi átök undanfarna sólarhringa. Alls hafa fimm sendifulltrúar Rauða krossins á Íslandi starfað á vettvangssjúkrahúsinu síðastliðna mánuði og sinnt heilbrigðisaðstoð við flóttafólk, komið að rekstri þess, uppsetningu og skipulagi. Í Al Hol búðunum hafast tæplega 70.000 manns við, tveir þriðju af þeim eru börn.

Vatnsskortur er mikið áhyggjuefni, sérstaklega í fyrrnefndri Hassakeh borg, þangað sem flóttafólk frá borgum og bæjum nálægt landamærunum að Tyrklandi streymir. Rauði krossinn kappkostar að tryggja öllum aðgang að hreinu vatni, en megin vatnsveita fyrir svæðið eyðilagðist í átökunum. Talið er að um 300.000 manns sem búa í nágrenni Hassakeh og Raqqa hafi lagt á flótta eða muni gera það á næstu dögum vegna átakanna. Þessi fjöldi samsvarar því að nærri öll íslenska þjóðin væri á flótta.

Umfangsmikið hjálparstarf

Sýrlenski Rauði hálfmáninn sinnir umfangsmiklu hjálparstarfi í Sýrlandi og stýrir lykilhlutverki í samhæfingu alþjóðlegs hjálparstarfs í landinu og kemur stórum hluta hjálpargagna frá Sameinuðu þjóðanna í hendur þolenda átaka. Starfsfólk og sjálfboðaliðar sýrlenska Rauða hálfmánans eru 9400 talsins og dreifast milli 59 deilda um allt Sýrland. Við hlið sýrlenska Rauða hálfmánans starfar Alþjóðaráð Rauða krossins (ICRC) sem hefur sinnt hjálparstarfi í landinu síðan 1967.

Rauði krossinn hefur aðgengi að svæðum sem engir aðrir hafa aðgang að í krafti hlutleysis síns og óhlutdrægni auk þess hlutverks sem Alþjóðaráðinu er falið samkvæmt Genfarsamningunum. Á þeim svæðum er m.a. nauðsynlegum hjálpargögnum komið til fólks og heilbrigðisþjónustu sinnt eftir fremsta megni. Mikil áhersla er lögð á að ræða við stríðandi fylkingar og kynna þeim Genfarsamningana sem eiga að vernda alla þá sem ekki taka þátt í átökunum. Með aukinni fræðslu má koma í veg fyrir að saklausir borgarar verði að flýja heimili sín og jafnvel heimaland.

Til þess að styðja við lífsbjargandi starf Rauða krossins í Sýrlandi er hægt að senda sms-ið HJALP í 1900 og 2900 krónur verða dregnar af símreikningi.

Einnig er hægt að leggja inn á reikning 0342 – 26 – 12, kt. 530269-2649 eða nota Kass.

• Fyrir 2900 kr. er hægt að útvega þremur börnum mat í mánuð.
• Fyrir 5000 kr. er hægt að útvega fimm börnum mat í mánuð og einu barni lífsnauðsynlega heilbrigðisþjónustu og lyf.