Almennar fréttir
Mikilvægt framlag tombólubarna
05. desember 2019
Tombólubörn söfnuðu rúmum 400.000 krónum á árinu sem fer til stuðnings börnum í Sómalíu.
Eitt allra gleðilegasta við starf Rauða krossins er að taka á móti tombólubörnum, sem fylla okkur stolti á hverju einasta ári. Tombólubörnin láta til sín taka um allt land, í öllum landshlutum. Í ár söfnuðu 146 tombólubörn rúmum 400.000 krónum!
Framlag tombólubarna er jafnan notað til að leggja börnum annars staðar í heiminum lið.
Í ár mun söfnunarféð renna til heilsugæslu á hjólum í Sómalíu, en það er í raun bíll með hjúkrunafræðingum og ljósmæðrum sem ferðast um dreifbýl svæði og veitir heilbrigðisþjónustu sem bjargar lífum. Þannig geta börn og barnshafandi konur fengið heilbrigðisþjónustu sem þær annars fengju ekki, líkt og bólusetningar og eftirlit. Heilsugæslan er líka opin öðrum íbúum sem þurfa á heilbrigðisaðstoð að halda.
![\"20181106_101520\"](\"/media/sendifulltruar/medium/20181106_101520.jpg\")
Um 25.000 börn, konur og menn nýta sér þjónustu heilsugæslunnar á hjólum sem Rauði krossinn á Íslandi styður og það má áætla að framlag tombólubarna muni greiða fyrir þjónustu um 1.000 þeirra, hvert tombólubarn veitir þannig að meðaltali sex börnum mikilvæga heilbrigðisþjónustu. Við hjá Rauða krossinum erum ótrúlega montin og þakklát fyrir stuðning tombólubarna og tombólubörn mega vera mjög stolt af sínu mikilvæga og lífsbjargandi framlagi. Sómalía er eitt af fátækustu ríkjum jarðar eftir langvarandi stríð og tíðar náttúruhamfarir eins og þurrka og flóð. Mörg börn í Sómalíu fá ekki alltaf reglulega að borða eða hreint vatn að drekka og sjúkdómar eru algengir. Þess vegna er mjög mikilvægt að þau fái bæði bólusetningar og eftirlit á heilsugæslu þar sem hægt er að veita þeim nauðsynlegan stuðning.
Með innilegu þakklæti fyrir starf tombólubarna í þágu mannúðar,
Kristín S. Hjálmtýsdóttir,
framkvæmdastjóri Rauða krossins á Íslandi
![\"tombola\"](\"/media/sendifulltruar/large/20181106_102744.jpg\")
![\"tombola\"](\"/media/sendifulltruar/large/20181106_102243.jpg\")
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.