Almennar fréttir
Mikið álag vegna reksturs farsóttarhúsa
11. janúar 2022
Vegna mikils fjölda Covid-19 smita undanfarnar vikur og daga hefur verið gríðarlegt álag á starfsfólk og sjálfboðaliða Rauða krossins. Í dag rekur Rauði krossinn alls sex farsóttarhús, fimm á höfuðborgarsvæðinu og eitt á Akureyri og í undirbúningi er að opna sjötta farsóttarhúsið á höfuðborgarsvæðinu.
Þessi hraði vöxtur hefur kallað á miklar mannaráðningar fyrir farsóttarhúsin. Allt starfsfólk þarf sérþjálfun áður en það getur tekið við starfi í farsóttarhúsi.
Mikil ásókn hefur verið að hjá smituðum einstaklingum að komast að hjá farsóttarhúsum. Þar sem mun meiri eftirspurn er en framboð, þarf að forgangsraða þeim sem nauðsynlega þurfa á vist að halda. Rauði krossinn biðlar til allra sem greinast með Covid-19 og geta verið heima að óska ekki eftir vist á farsóttarhúsi nema af brýnni nauðsyn. Allir sem geta dvalið heima í einangrun ættu að velja þann kost.
Starfsmenn Rauða krossins hringja nú allan daginn í fólk sem óskar eftir dvöl og forgangsraða smituðum einstaklingum inn á farsóttarhúsin. Í forgangi eru þeir sem með engu móti geta dvalið í heimahúsi og ferðamenn sem ekki geta dvalið á hefðbundnum hótelum lengur. Algengt er að ferðamenn sem hafa þegar skráð sig út af hóteli greinist síðan í hraðprófi með Covid-19 á leið úr landi. Þeir geta ekki bókað hótelherbergi á ný og eru því ekki með þak yfir höfuðið. Þá er lögð áhersla á að smitaðir einstaklingar sem ekki geta dvalið heima vegna alvarlegra undirliggjandi sjúkdóma annarra heimilismanna fái inni á farsóttarhúsi.
Rauði krossinn vill góðfúslega benda á að erfitt getur reynst að ná símasambandi við félagið núna vegna mikils álags af þessum ástæðum og á það líka við um Hjálparsímann 1717.
Þá vill Rauði krossinn nota tækifærið og þakka öllum stuðningsaðilum sínum. Á slíkum álagstíma er mikilvægt að geta reitt sig á sterkt bakland eins og Mannvini Rauða krossins. Hægt er að gerast mánaðarlegur styrktaraðili hér .
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.