Almennar fréttir
Gaman og gefandi að vera vinur á vegum Rauða krossins
21. júlí 2023
Eva Rós Gústavsdóttir hefur verið sjálfboðaliði í vinaverkefnum Rauða krossins frá því í byrjun árs, en hún er bæði göngu- og heimsóknarvinur. Eva er í sálfræðinámi og eftir að hafa lært um hversu slæm áhrif félagsleg einangrun hefur á fólk ákvað hún að gerast sjálfboðaliði.
„Upphaflega var systir mín sjálfboðaliði hjá Rauða krossinum og ég fékk þá hugmynd að mig langaði að gera það líka,“ segir Eva. „Ég hafði nægan tíma og mig langaði að gefa af mér. Klukkutími á viku er kannski ekkert rosalega mikið fyrir mig en gæti breytt öllu fyrir gestgjafann.
Það er erfitt fyrir marga að sækja í félagsstarf á eigin vegum, t.d. vegna félagskvíða eða geðræns vanda sem hamlar fólki sem vill taka þetta skref,“ segir Eva aðspurð hvers vegna vinaverkefnin skipta máli.
Eva var áður sjálfboðaliði hjá Konukoti og er að vinna hjá Píeta samtökunum. „Eftir Covid hefur félagsleg einangrun aukist töluvert og mig langaði til að aðstoða við að rjúfa það,“ segir hún.
„Vinaverkefnin vöktu áhuga minn þar sem þau hjálpa fólki að rjúfa félagslega einangrun. Einnig er þetta tækifæri fyrir mig til að kynnast fólki sem ég myndi aldrei kynnast annars,“ bætir hún við. „Það er hollt fyrir alla að breikka sjóndeildahringinn og umgangast fólk með ólíkan bakgrunn.
Eva er með tvo gestgjafa, konu á hennar aldri og svo eldri mann. Hún fer ýmist í heimsókn til gestgjafans, í göngutúr, út að borða eða heyrir í honum í síma.
Hvetur öll sem hafa áhuga að sækja um
Eva segir að hún hafi ánægju af því að hjálpa fólki að rjúfa félagslega einangrun. „Þetta lætur mér einnig líða vel, að vita að ég er að gera heiminn að betri stað,“ segir hún. „Ég læri líka mikið af því að vera sjálfboðaliði í vinverkefnum Rauða krossinn, það er gaman að umgangast fólk sem er með mikla lífsreynslu og hefur skemmtilegar og fróðlegar sögur að segja.“
Að lokum vill Eva hvetja öll sem hafa áhuga á sjálfboðaliðastarfi að sækja um. „Það er rosalega góð eftirfylgni í vinaverkefnunum, það er athugað hvort sjálfboðaliðar og gestgjafar passi saman – það er alls ekki verið að neyða tvo eintaklinga til að hanga saman. Það er líka hringt í báða aðila til að athuga hvernig sambandið gengur,“ útskýrir hún. „Það er einnig góð leiðsögn hjá Rauða krossinum, góð námskeið sem sjálfboðaliðar geta tekið, ég tók til dæmis frábært námskeið í sálrænni fyrstu hjálp.“
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.