Almennar fréttir
Fyrrum nemandi Jafnréttisháskólans veitir Rauða krossinum ráðgjöf
24. júní 2019
Undanfarnar vikur hefur Rauði krossinn notið liðsinnis hinnar palestínsku Jolene Zaghloul.
Undanfarnar vikur hefur Rauði krossinn notið liðsinnis hinnar palestínsku Jolene Zaghloul. Jolene hefur lögfræðimenntun frá Abu Dies háskólanum í Palestínu og King Mohammad the Fifth háskólanum í Marokkó. Í heimalandinu vann hún við lögfræðiráðgjöf fyrir einstaklinga sem sættu ákæru og fangelsisvist. Þá hefur hún einnig unnið að ýmsum mannréttindamálum. Árið 2012 útskrifaðist hún frá Jafnréttisháskóla Sameinuðu Þjóðanna í Reykjavík með diplóma í alþjóðlegum jafnréttisfræðum þar sem lokaverkefni hennar fjallaði um réttindi kvenna í palestínskum fangelsum. Jolene er íslenskur ríkisborgari og undanfarin ár hefur hún unnið sem verkefnisstjóri í Jafnréttishúsi með innflytjendum, hælisleitendum og flóttafólki á Íslandi.
Rauði krossinn á Íslandi og Rauði hálfmáninn í Palestínu hafa um árabil átt farsælt samstarf í langtímaþróunar- og mannúðarverkefnum. Núverandi verkefni miðar að því að skapa umhverfi sem veitir fólki í Palestínu öryggi og stuðning. Rauði krossinn leggur mikla áherslu á að efla þátttöku stúlkna í verkefninu og valdeflingu þeirra sem áhrifavaldar í samfélögum sínum. Þetta er eitt þeirra verkefna sem Jolene veitti Rauða krossinum ráðgjöf við. Þá veiti hún lögfræðingum og öðru starfsfólki Rauða krossins stuðning í vinnu þeirra fyrir hælisleitendur og málsvarastarfi fyrir flóttafólk á Íslandi.
Rauði krossinn og Jafnréttisháskóli Sameinuðu þjóðanna undirrituðu samstarfsyfirlýsingu í nóvember á síðasta ári. Meðal markmiða samstarfsyfirlýsingarinnar er byggja upp og efla samstarf Rauða krossins við nemendur sem koma af sameiginlegum áherslusvæðum Jafnréttisháskólans og Rauða krossins.
„Það er mikill fengur fyrir Rauða krossinn að fá tækifæri til að vinna með reynslumiklum sérfræðingi sem hefur þessa sérstöku innsýn eftir að hafa búið á því átakasvæði sem Palestína er og við í Rauða krossinum höfum unnið á undanfarna áratugi.“ segir Guðný Nielsen á Hjálpar- og mannúðarsviði Rauða krossins.
„Jafnréttisháskóla Sameinuðu þjóðanna í Reykjavík sækja framúrskarandi einstaklingar víða að og það skapar einstakt tækifæri fyrir íslensk borgarasamtök, sem mörg hver sinna þróunar- og mannúðaraðstoð í þeirra heimalöndum, til að fá þeirra innsýn. Þá leggjum við í Rauða krossinum lykiláherslu á jafnrétti kynjanna og valdeflingu kvenna í okkar alþjóðastarfi og aðgengi að nemendum Jafnréttisháskólans gefur tækifæri fyrir mikil samlegðaráhrif.“
Fréttir af starfinu
Fréttayfirlit
100 ára afmælishátíð Rauða krossins í Hörpu
Almennar fréttir 20. desember 2024Rauði krossinn á Íslandi náði þeim áfanga á dögunum að ná 100 ára aldri. Tímamótunum hefur verið fagnað með ýmsum hætti, svo sem greinaskrifum, viðtölum, útgáfu viðamikils rits um sögu félagsins og nú síðast hátíðarfundar í Hörpu þann 10. desember síðastliðinn.
Mannúð í heila öld - Rauði krossinn á Íslandi fagnar 100 ára afmæli
Almennar fréttir 10. desember 2024Í dag, 10. desember, fagnar Rauði krossinn á Íslandi 100 ára afmæli sínu. Árið 1924 var félagið stofnað vegna aukinnar vitundar um þörfina fyrir mannúðarstarfsemi á Íslandi en skortur var á kerfisbundinni neyðaraðstoð og félagslegum stuðningi fyrir þá sem lentu í áföllum. Í dag er Rauði krossinn orðinn að ómissandi hluta af samfélaginu, með sjálfboðaliðum og starfsmönnum um allt land.
Rauði krossinn 100 ára - söfnun í samstarfi við Finnsson & Co
Almennar fréttir 03. desember 2024Rauði krossinn á Íslandi fagnar 100 ára afmæli sínu þann 10. desember 2024. Af því tilefni höfum við sett af stað landssöfnun þar sem við óskum eftir stuðningi fyrirtækja og félagasamtaka um land allt við innlend verkefni RKÍ. Við njótum liðsinnis fyrirtækisins Finnsson & Co við söfnunina, en það hefur áður sinnt sambærilegum útgáfu- og fjáröflunarverkefnum.