Almennar fréttir

Eliza Reid, forsetafrú, heimsótti í dag starfstöð Rauða krossins við Efstaleiti, þar sem sjálfboðaliðar svara dag og nótt í Hjálparsíma Rauða krossins 1717 og færði þeim heimabakaðar kökur.

Mikið álag hefur verið á Hjálparsímanum upp á síðkastið, en auk þess að veita sálrænan stuðning tekur síminn einnig við yfirfalli frá símanúmeri Læknavaktarinnar 1700. Undanfarna sólarhringa hafa sjálfboðaliðar Hjálparsímans aldrei svarað jafn mörgum símtölum.

Eliza starfaði sjálf sem sjálfboðaliði fyrir Rauða krossinn fyrst þegar hún flutti til Íslands. „Mannvinir og sjálfboðaliðar Rauða krossins eiga þakkir skilið. Það er greinilegt að framlag þeirra skiptir gríðarlegu máli á tímum sem þessum,“ segir Eliza Reid.

„Sjálfboðaliðar Hjálparsímans og sóttvarnarhússins sinna afar mikilvægu hlutverki um þessar mundir og standa sig eins og hetjur. Sjálfboðaliðar sem sinna ýmsum verkefnum sem beinast að því að rjúfa félagslega einangrun hafa jafnframt sýnt einstakan sveigjanleika í starfi sínu, til dæmis með því að breyta verkefnum sínum úr heimsóknarvin yfir í símavin. Ljóst er að verkefni Rauða krossins munu aukast næstu vikur og við viljum þakka þann hlýhug og velvilja sem félagið hefur fundið fyrir frá almenningi síðustu daga en bæði hefur bæst í hóp Mannvina og sjálfboðaliða,“ segir Kristín S. Hjálmtýsdóttir, framkvæmdastjóri Rauða krossins.

Mannvinir eru mánaðarlegir styrktaraðilar Rauða krossins. Á álagstímum sem þessum skiptir framlag þeirra öllu máli. Hér er hægt að leggja Rauða krossinum lið.