Það fer allt eftir óskum arfleiðanda. Hægt er að leggja fram ósk um að arfur fari í ákveðin verkefni, verkefni tengd ákveðnum málaflokkum eða til starfs Rauða krossins.

Erfðaskrá segir til um ráðstöfun eigna einstaklings við andlát hans. Hægt er að gera erfðaskrá hvenær sem er, eftir að einstaklingur hefur náð 18 ára aldri, allt fram að andláti. 

Ekki er nauðsynlegt að láta erfingja vita af tilvist erfðaskrár og henni má breyta eða afturkalla hvenær sem er fram að andláti. 

Erfðaskrá er jafngild hvort sem hún er undirrituð og skráð hjá sýslumanni eða ekki. Ákveðið öryggi felst þó í því að skrá hana hjá sýslumanni en þá er öruggt að rétt sé staðið að gerð hennar og hún sé varðveitt á öruggum stað.

Við gerð erfðaskráa þarf að gæta sérstakra reglna sem varða erfðaskrárformið svo að hún sé gild skv. lögum. Mælt er með að fólk ráðfæri sig við sérfræðinga við gerð hennar.

Einstaklingum, sambúðarfólki eða hjónum er heimilt er að gera sameiginlega erfðaskrá í samræmi við erfðalög. 

Fjármunir og eignarréttindi hins látna erfast.

Maki og börn eru skylduerfingjar. Ef arfleifandi á skylduerfingja á lífi má hann að hámarki ráðstafa 1/3 eigna sinna með erfðaskrá, en að minnsta kosti 2/3 verða að ganga til skylduerfingja. 

Arfleifandi sem á enga skylduerfingja á lífi getur ráðstafað öllum eignum sínum með erfðaskrá.

Ef engin erfðaskrá hefur verið gerð, eiga lögerfingjar rétt á arfi skv. lögum. Lögerfingjar eru:

• Börn hins látna og aðrir niðjar.

• Maki hins látna.

• Foreldrar hins látna og systkini.

• Föður- og móðurforeldrar hins látna og börn þeirra.

Ef engir lögerfingjar eru til staðar, rennur arfur sem ekki hefur verið ráðstafað í ríkissjóð.

Erfðafjárskattur er skattur sem leggst á arfshlut. Enginn erfðafjárskattur er hins vegar greiddur af arfi sem arfleiddur er til félaga eins og Rauða krosssins.

Samkvæmt erfðalögum má greiða skylduerfingjum, lögerfingjum og öðrum erfingjum fyrirfram út arfshluta þeirra að hluta til eða öllu leyti. Við slíka fyrirframgreiðslu arf ber eringja eða erfingjum að ganga frá og undirrita erfðafjárskýrslu og afhenda sýslumanni til yfirferðar og ákvörðunar á erfðafjárskatti. Skattur af fyrirframgreiddum arfi er 10% af öllum arfshlutanum.

Meginreglan er sú að óheimilt er að gefa erfingjum fyrirmæli um meðferð á arfi. Þetta á hins vegar ekki um arf sem er ekki skylduarfur. Auk þess er heimilt að kvaðabinda skylduarf ef verulegar líkur eru á því að erfingi muni fara ráðleysislega með hlut sinn, en fyrirmæli um að kvaðabinda arf þarf alltaf að setja í erfðaskrá. Slík ákvæði eru háð samþykki sýslumannsembættisins á Norðurlandi Eystra, þegar um skylduerfingja er að ræða. Að öðru leyti fer það eftir vilja erfingja að taka tillit til óska arfleifanda.